Norski olíusjóðurinn eykur hlutabréfakaup um 50%.
Norski olíusjóðurinn mun auka hlutdeild sína í hlutabréfum úr 40% í 60% af eignum. Þetta kom fram í erindi Knut Kjær, forstjóra Norska olíusjóðsins, sem hann hélt á ráðstefnu ABP lífeyrissjóðsins í Hollandi í dag.
Í erindi Knut Kjær sem fjallaði um langtímafjárfestingar kom fram að norska þingið hefði ákveðið að norski olíusjóðurinn sem er í ríkiseign mundi auka hlutabréfakaup sín á næstunni. Kjær sem hefur stjórnað norska olíusjóðnum í 10 ár sagði að lífeyrissjóðir sem langtímafjárfestar ættu frekar að líta á sig sem “eigendur hlutabréfa” heldur en “lánardrottna” á skuldabréfamarkaði.
Kjær lagði áherslu á að mikilvægi þess að endurmeta þurfi allar fjárfestingar og greindi frá því að allar tekjur, sem kæmu framvegis í sjóðinn vegna olíunnar, yrði notaðar til að fjárfesta í hlutabréfum.
Hann benti á að á árinu 1997 hefði sjóðurinn fjárfest 100% í skuldabréfum, en sjóðurinn hefði smám saman aukið aukið áhættuna í fjárfestingum sínum.
Þrátt fyrir stöðuga gagnrýni frá norskum fjölmiðlum og mörgum stjórnmálamönnum hefur árleg meðalávöxtun sjóðsins numið 4,6% frá ársbyrjun 1997.
“Langtímafjárfesting er um það að vera reiðubúinn að viðurkenna flökt og óstöðugleika á mörkuðunum”, bætti Kjær við.
Forstjórinn hefur nýlega tilkynnt afsögn sína sem forstjóri sjóðsins, en ekkert hefur komið fram opinberlega hvað hann ætlar sér fyrir, þegar henn yfirgefur Norska olíusjóðinn.
Kjær fæddist í Tønsberg í Noregi á sumardaginn fyrsta árið 1956. Hann var erfingi flatkökuverksmiðju eða öllu frekar hrökkbrauðsverksmiðjunnar Korni, sem móðurafi hans stofnsetti. Varla er þó búist við því að hann taki við rekstri verksmiðjunnar.
