Verðmæti lífeyrisréttinda

Landssamtök lífeyrissjóða leggja áherslu á fræðslu um lífeyrismál og haldin var málstofa í samstarfi við Mannauð, félag mannauðsfólks á Íslandi, þann 27. nóvember 2024, þar sem lögð var áhersla á verðmæti lífeyrisréttinda og starfslok.

Við erum með öflugt lífeyrissjóðakerfi á Íslandi en mikilvægt er að huga að því hvað sé hægt að gera betur og það byggir fyrst og fremst á þekkingu. Þess vegna er mikilvægt að þau sem eru að ráða fólk, og koma að mannauðsmálum almennt, búi yfir góðri þekkingu og geti miðlað henni áfram.

Á málstofunni voru flutt erindi frá einstaklingum úr ýmsum áttum þar sem markmiðið var að fræða bæði um lífeyrissjóðakerfið sjálft á Íslandi ásamt því að heyra reynslusögur innan fyrirtækja og mannauðsdeilda þeirra. Öll erindin má sjá hér fyrir neðan í fullri lengd.

• Þórey S. Þórðardóttir, framkvæmdastjóri Landssamtaka lífeyrissjóða, fer yfir helstu atriði sem huga þarf að við upphaf lífeyristöku. 

• Þorsteinn Víglundsson, framkvæmdastjóri Hornsteins, stjórnarmaður S.A., fv. alþingismaður og ráðherra, fer yfir hvaða verðmæti felast í rauninni í lífeyrisréttindum. Fyrirtæki greiða að lágmarki 11,5% launa í lífeyrissjóð fyrir starfsfólk og starfsmaðurinn borgar 4% sjálfur. Fyrir flesta verður þetta verðmætasta fjárhagslega eign þeirra eftir starfslok og tryggir fjárhagslegt öryggi þeirra og fjölskyldunnar vegna örorku eða andláts.

• Hildur Hörn Daðadóttir, formaður fræðslunefndar LL og forstöðumaður rekstrarsviðs Lífeyrissjóðs verzlunarmanna, fjallaði um að rannsóknir bendi til þess að margir vilji hætta fyrr að vinna eða minnka við sig í stað þess að hætta alveg. Mikilvægt sé að atvinnulífið bjóði upp á sveigjanlega starfslokastefnu sem tekur mið af óskum og þörfum starfsfólks á þessum tímamótum.

Sérfræðingar innan mannauðsdeilda VÍS, BYKO, Arion banka og Vinnueftirlitsins fjölluðu um þeirra starfslokastefnur, hvernig hægt sé að bjóða upp á sveigjanleika við starfslok ásamt því hvernig skynsamlegt sé að haga undirbúning fyrir starfslok með fræðslu og ráðgjöf til starfsfólks. 

• Brynja B. Gröndal, mannauðsstjóri hjá Arion banka, fjallaði um markmið þeirra að laða að og halda í hæft starfsfólk með því að skapa jákvætt og hvetjandi starfsumhverfi sem styður við faglegan og persónulegan vöxt. Lögð er áhersla á faglegar ráðningar, góða móttöku nýliða og vandaðan viðskilnað við starfslok til að tryggja árangursríka vinnustaðamenningu.

• Anna Rós Ívarsdóttir, framkvæmdastjóri mannauðs og menningar hjá VÍS, fjallaði um hvernig traust mannauðs- og starfslokastefna hefur skipt gríðarlegu máli í þeirra fyrirtæki og deildi reynslusögum frá starfsfólki sem hefur notið sveigjanleika við sín starfslok. Þau setja upp skýrar reglur þar sem starfsfólk lætur af störfum í síðasta lagi við 67 ára aldur og til að undirbúa starfsfólk fyrir þessi tímamót eru í boði starfslokanámskeið 3-5 árum fyrir starfslok þar sem mökum er einnig boðið að taka þátt.

• Sveinborg Hafliðadóttir, mannauðs- og stefnustjóri BYKO, fjallaði um starfslokastefnu BYKO og hversu miklu máli það skiptir fyrir starfsfólk að vera vel upplýst um það við hverju má búast og hvernig starfslokaferlið er. Þau leggja áherslu á að nýta dýrmæta reynslu eldra starfsfólks með fræðslu, ráðgjöf og samtali á mismunandi aldursstigum til að undirbúa starfslokin. Eldra starfsfólk hefur mikla þekkingu á vörum og þjónustu fyrirtækisins og getur með því veitt verðmæta ráðgjöf og framúrskarandi þjónustu við viðskiptavini.

• Bergrún L. Sigurjónsdóttir, mannauðsstjóri Vinnueftirlitsins, fór yfir stefnu um sveigjanleg starfslok þar sem fólki býðst aukið valfrelsi við starfslok, enda geti verið verðmætt að byggja á reynslu þeirra sem eldri eru og brúa bil milli kynslóða. Einnig er lögð áhersla á að kveðja starfsfólk við lok starfsævinnar sé jafnmikilvægt og að taka vel á móti því í upphafi starfs enda sé heilbrigð vinnustaðamenning, sem leggur áherslu á vellíðan og öryggi starfsfólks, lykillinn að árangri vinnustaða.

Við mælum með að fólk kynni sér málið og sé vel upplýst um réttindi sín.  Hver eru réttindi þín hjá lífeyrissjóðum?
Kíktu á Lífeyrisgáttina

Upplýsingar um ellilífeyri, skiptingu hans og umsóknir má finna á vefsíðu okkar. Við mælum með að hver og einn kynni sér málið hjá sínum lífeyrissjóði og hægt er að panta tíma í ráðgjöf hja lífeyrissjóðunum.

Nánar um Ellilífeyri