Gott milliuppgjör hjá Framsýn.
Raunávöxtun Lífeyrissjóðsins Framsýnar fyrstu sex mánuði ársins 2004 nam 18,4% á ársgrundvelli og hefur hrein eign sjóðsins hækkað um tæplega 7,8 milljarða króna frá áramótum. Góð ávöxtun megi rekja til góðrar ávöxtunar á hlutabréfamörkuðum en einnig hafi náðst árangur við að stýra gengisáhættu í tengslum við erlendar eignir sjóðsins.
Rekstrarkostnaður sjóðsins lækkaði milli ára, var 0,08% af eignum fyrri hluta síðasta árs en 0,06% fyrstu sex mánuði þessa árs.
Iðgjaldagreiðslur til sjóðsins námu tæplega 1,6 milljörðum króna á tímabilinu, sem er aukning upp á 14,1% miðað við sama tíma í fyrra. Lífeyrisgreiðslur hækkuðu um 6,7% miðað við fyrri ársins 2003, námu 1,1 milljarði króna, og er lífeyrisbyrði sjóðsins 70,2% (þ.e. lífeyrigreiðslur sem hlutfall af iðgjaldagreiðslum). Hrein eign til greiðslu lífeyris nam alls tæpum 71,3 milljörðum kr. í lok tímabilsins og fjöldi lífeyrisþega var rúmlega 9000.
Ávöxtun séreignarsjóðs nam 17,2% á fyrri hluta þessa árs og hefur hrein eign sjóðsins aukist um 209 milljónir króna frá áramótum. Rétthöfum fjölgaði um 3100 á fyrstu 6 mánuðum ársins og voru þeir alls um 29.500 í lok tímabilsins. Iðgjaldagreiðslur voru um 134 milljónir króna og lífeyrisgreiðslur um 2,5 milljónir á tímabilinu.
