Eignir lífeyrissjóðanna yfir 800 milljarða króna um síðustu áramót.

Samkvæmt upplýsingum frá Seðlabanka Íslands áætlar bankinn að eignir lífeyrissjóðanna hafi numið 804.571 m.kr. um síðustu áramót og hafi því hækkað um 18,5% á einu ári. Þessi áætlun er byggð á úrtaki 25 stærstu lífeyrissjóðanna með yfir 94% af hreinni eign allar sjóða í landinu.  Þessa hækkun má m.a rekja til þess að raunávöxtun lífeyrissjóðanna var mjög góð í fyrra eða yfir 10% að meðaltali.

 Lífeyrissjóðirnir fjárfestu umtalsvert erlendis á síðasta ári, en erlendar eignir námu alls 156.069 m.kr. eða 19,4% af heildareigninni í árslok 2003 og höfðu hækkað um 53.148 m.kr. eða um 51.6 % frá árslokum 2002, þegar erlendu eignirnar námu 102.922 m.kr. eða um 15,2% af heildareign sjóðanna. Þessa hækkun má einnig rekja til þess að erlendir hlutabréfamarkaðir hækkuðu mikið í fyrra.

 Lán til sjóðfélaga námu alls 90.702 m.kr. í árslok 2003 og höfðu hækkað um tæp 9% á árinu. Um töluverða lækkun er að ræða miðað við árið 2002, þegar sjóðfélaga-lánin hækkuðu um 17%.

 Eignir lífeyrissjóðanna, sem beinlínis má tengja við íbúðalán námu alls 266.775 m.kr í árslok 2003. Auk sjóðfélagalána munar þar mestu um eignir sjóðanna í húsbréfum og húsnæðibréfum Íbúðalánasjóðs. Þannig er ljóst að lífeyrissjóðirnir eru langstærstu lánveitendur á íbúðamarkaði.

Eignir lífeyrissjóðanna í reiðufé í bönkum námu alls 18.569 m.kr. eða um 2,3% af heildareignum sjóðanna, sem er svipað hlutfall og árið áður.