Frestun á framkvæmd tekjuathugunar til næstu áramóta.
Lífeyrissjóðir sem aðild eiga að Greiðslustofu lífeyrissjóða hafa ákveðið að fresta framkvæmd breytinga vegna tekjuathugunar örorkulífeyrisþega til ársloka 2006.
Ástæðan er sú að í ljós hefur komið að sá frestur sem veittur var bótaþegum til þess að skila inn viðhlítandi gögnum reyndist ekki nægjanlegur í sumum tilvikum. Til þess að koma til móts við bótaþegana hefur verið ákveðið að gefa lengri frest til að skila inn gögnum.
Örorkulífeyrisþegar sem fengið hafa tilkynningu um niðurfellingu eða lækkun örorkulífeyris munu því njóta óskerts örorkulífeyris frá viðkomandi lífeyrissjóðum í þrjá mánuði til viðbótar, þannig að síðasta greiðsla verði um næstu áramót.
Mikilvægt er að árétta að samkvæmt samþykktum lífeyrissjóðanna stofnast því aðeins réttur til örorkulífeyris að sjóðfélagi hafi orðið fyrir tekjutapi af völdum örorkunnar. Við samanburð á tekjum örorkulífeyrisþega fyrir og eftir orkutap hefur komið í ljós að margir örorkulífeyrisþegar eru með hærri tekjur nú en þeir höfðu fyrir orkutap. Skiptir þá ekki máli hvort notuð er vísitala neysluverðs eða launavístala til að bera saman þróun þeirra tekna sem hafðar eru til viðmiðunar eins og sumir hafa haldið fram í umræðu liðinna vikna.
Fram hjá þessum staðreyndum geta lífeyrissjóðirnir ekki horft því það er andstætt samþykktum þeirra að greiða örorkulífeyri ef sjóðfélagi hefur ekki orðið fyrir tekjutapi vegna örorkunnar. Gildir þá einu hvort tekjurnar verða til vegna launaðra starfa eða sem greiðslur frá Tryggingastofnun. Ef ekki væri gripið til viðeigandi ráðstafana væru lífeyrissjóðirnir að bregðast skyldum sínum gagnvart öðrum sjóðfélögum, sem þyrftu að sæta lægri lífeyrisgreiðslum í framtíðinni.
Á liðnum árum hafa greiðslur lífeyrissjóðanna til öryrkja aukist langt umfram áætlanir tryggingafræðinga sjóðanna. Hjá nokkrum lífeyrissjóðum á almennum vinnumarkaði nemur örorkulífeyrir um og yfir 40% af heildarlífeyrisgreiðslum. Það er ótvíræð skylda stjórnenda sjóðanna að bregðast við með þeim hætti sem samþykktir lífeyrissjóðanna kveða á um, eins og segir í fréttatilkynningu frá Greiðslustofu lífeyrissjóða.
