Eignir lífeyrissjóða 537 miljarðar króna í lok febrúar 2000
Samkvæmt áætlun Seðlabanka Íslands, sem byggir á úrtaki 27 stærstu lífeyrissjóðanna, nam hrein eign til greiðslu lífeyris 537 miljörðum króna í lok febrúar á þessu ári. Eignirnar hafa aukist um 121 miljarð króna miðað við sama tíma í fyrra. Erlendu eignirnar eru taldar nema 108 miljörðum króna.
Tölfræðisvið Seðlabanka Íslands áætlar þessar tölur, sem telja verður mjög áreiðanlegar, þar sem þær byggja á úrtaki 27 stærstu lífeyrissjóðanna með um 91% af heildareignum sjóðanna. Í lok febrúar 2000 námu erlend verðbréf í eigu lífeyrissjóðanna um 108 miljörðum króna borið saman við 55 miljaðar króna í lok febrúar árið 1999. Aukningin er um 96% sem er mjög mikil en þó fyllilega eðlileg, þar sem lífeyrissjóðirnir eru nú hver á fætur öðrum að breyta eignasöfnum sínum og takmarka áhættu með kaupum á erlendum verðbréfum, einkum hlutabréfum í verðbréfasjóðum. Erlendar eignir lífeyrissjóðanna sem hlutfall af heildareignum eru nú rúmlega 20%. Sambærilegt hlutfall var um 18,7% um síðustu áramót og 12,2% í árslok 1998. Þá liggja ennfremur fyrir tölur frá Seðlabankanum um viðskipti við útlönd með erlend verðbréf. Velta innlendra aðila með erlend verðbréf var mikil í febrúar. Kaup námu um 11,7 ma.kr. og sala/innlausn um 5,8 ma.kr., nettóviðskipti voru 5,9 ma.kr. Nettóviðskipti fyrstu tvo mánuði ársins hafa numið 8.9 ma. kr. miðað við 3.6 ma. kr. fyrir janúar og febrúar í fyrra. Sem fyrr eru kaupin mest í hlutdeildarskírteinum í erlendum verðbréfasjóðum, einkum hlutabréfum.
