Allt eins líklegt að uppgjöri við skilanefndir verði vísað til dómstóla

Samkomulag um uppgjör lífeyrissjóða við skilanefndir viðskiptabankanna þriggja er ekki í sjónmáli. Allt eins líklegt er að málið verði til lykta leitt í dómsölum. Þetta kom fram í máli Arnars Sigurmundssonar, formanns Landssamtaka lífeyrissjóða, á aðalfundi samtakanna á Grand Hóteli Reykjavík í gær. Hann vísað þar annars vegar til gjaldmiðlavarnasamninga lífeyrissjóða við bankana sem féllu síðastliðið haust og hins vegar til skuldabréfa sem sjóðirnir áttu hjá bönkunum.

Gjaldeyrisvarnasamningum var ætlað að  að draga úr sveiflum á erlendum eignum lífeyrissjóðanna og þegar bankarnir fóru á hliðina voru slíkir samningar alls fimmtán sjóða komnir í neikvæða stöðu upp á hátt í 70 milljarða króna vegna gengisfalls íslenskrar krónu. Á sama tíma áttu lífeyrissjóðirnir skuldabréf upp á um 100 milljarða króna í þessum sömu bönkum og allt frá því í október hafa staðið yfir þreifingar og viðræður um gagnkvæmt uppgjör lífeyrissjóða og skilanefnda bankanna en án árangurs.

Lífeyrissjóðirnir lögðu til í lok árs 2008 að samið yrði um skuldajöfnun vegna skuldabréfa og greiðslu mismunar miðað við opinbera gengisvísitölu í októberbyrjun, 175. Skilanefndirnar fengust ekki til að ræða málið á þeim forsendum. Í mars síðastliðnum hófust svo viðræður eins  lífeyrissjóðs við skilanefnd Landsbanka Íslands, sem litið var á að gætu orðið „prófmál“ fyrir uppgjör lífeyrissjóðanna yfirleitt.

Arnar Sigurmundsson er ekki bjartsýnn á að samkomulag næðist heldur með þeirri leið og allt eins líklegt sé því að dómstólar muni á endanum höggva á hnútinn. Hann sagði á aðalfundinum að mjög mikilvægt værir fyrir alla að ljúka málinu sem fyrst og bætti við: „Óvissan gerir lífeyrissjóðum mjög erfitt fyrir varðandi nákvæma útreikninga á tryggingafræðilegri stöðu sinni og illfært fyrir þá að koma að óbreyttu að stofnun og fjármögnun „Endurreisnarsjóðs Íslands“ sem mikilvægur er í uppbyggingu íslensks atvinnulífs.“

Ræða Arnar Sigurmundssonar í heild