Rannsókn á nægjanleika lífeyrissparnaðar
Í desember 2014 gaf Fjármálaeftirlitið, í samstarfi við Landssamtök lífeyrissjóða, út skýrslu um nægjanleika lífeyrissparnaðar á Íslandi. Rannsóknin var að mestu leyti sambærileg verkefni sem OECD átti frumkvæði að og hefur verið unnið samtímis í nokkrum löndum í Evrópu og Ameríkuálfunum.
Helstu niðurstöður rannsóknarinnar voru að íslenska lífeyriskerfið er sterkt í alþjóðlegum samanburði og uppfyllir meginkröfur OECD. Ísland sker sig úr að því leyti að nærri 77% af lífeyrisgreiðslum munu koma úr sjóðum sem hafa safnað eignum til greiðslu lífeyris. Í niðurstöðunum segir einnig að lífeyrisgreiðslur Tryggingastofnunar eru mikilvægt öryggisnet fyrir lágtekjuhópa. Öllum, sem uppfylla skilyrði um 40 ára búsetu á Íslandi, er tryggður lífeyrir vel umfram fátæktarmörk. Einnig kemur fram að greiðslur lífeyrissjóðanna munu fara hækkandi á komandi áratugum og samanlagður lífeyrir frá sjóðunum og almannatryggingum verður að meðaltali um þriðjungi hærri en hjá þeim sem nýlega hófu töku lífeyris. Jafnframt mun hlutur viðbótarlífeyrissparnaðar (séreignar) fara vaxandi.
