Minjavernd stendur að gerð þyrpingar gamalla húsa á Fáskrúðsfirði

Virðing hf. hefur í samstarfi við fjárfesta lokið langtímafjármögnun vegna umfangsmesta verkefnis sem Minjavernd hefur ráðist í utan höfuðborgarsvæðisins. Verkefnið felst í endurbyggingu sögufrægra húsa á Fáskrúðsfirði, sem staðsett verða í þyrpingu við sjóinn. Verður Franski spítalinn frá 1903 þar í öndvegi, en húsið var að hruni komið enda verið í niðurníðslu í nær hálfa öld.

Minjavernd hf. hefur að meginmarkmiði að endurbyggja og varðveita gömul og sögufræg hús um allt land. Verkefnið á Fáskrúðsfirði er hið umfangsmesta, sem félagið hefur ráðist í til þessa, en ætlunin er að endurbyggja helstu húsin sem tengdust veru og þjónustu við franska fiskimenn á Fáskrúðsfirði.

Búið er að taka niður hús spítalans á Hafnarnesi, þar sem það hefur staðið frá árinu 1939, og flytja til Fáskrúðsfjarðar. Þar verður húsið endurbyggt frá grunni og hefur mikil vinna þagar farið fram í vetur, svo sem við að hreinsa upp allan panel. Spítalinn verður staðsettur fyrir neðan Læknishúsið og verður innangengt milli húsanna. Gert er ráð fyrir að gamla kapellan, sjúkraskýlið og líkhús spítalans, sem byggð voru á árunum frá 1896 til1904, verði hluti húsaþyrpingarinnar auk þess sem ætlunin er að smíða bryggju fyrir neðan húsin.

Húsaþyrpingin á að nýtast ferðaþjónustunni eystra og því er m.a. ætlunin að opna safn um sjósókn Frakka við Ísland, hótel og aðra starfsemi, þannig að svæðið í heild geti tengst þeirri stórmerkilegu sögu sem þarna liggur að baki og lítil skil hefur verið gerð. Gert er ráð fyrir að rekstur hefjist vorið 2014. Kostnaður við framkvæmdirnar er áætlaður um 580 milljónir króna.